Saturday, October 25, 2014

澳門五

吃喝玩樂嘅日子要走就走,幾時都係要及時行樂,風花雪月唔係必然嘅。


呢日早餐食豬扒飽,蛋撻,葡撻,燕窩撻。食完行吓尋常街巷,消化之後再到手信街食木糠布甸,買手信。

姊妹們要去銀河酒店睇鑽石,我對咁大粒嘅鑚石興趣不大,都係返去酒店食埋個自助餐實際啲,食多個葡撻至得。






Monday, October 6, 2014

澳門四

嚟澳門離不開飲飲食食,呢晚食葡菜,訂咗位都要等一陣,難怪咁好生意,好食又唔貴,睇吓我哋食左乜,有葡國雞,海鲜飯,燒骨,芒果蝦沙律,而我最鍾意嘅係嗰碟菜,鴨飯同埋白烚馬介休,唔係成日有得食,特别滋味。


餘興節目睇煙花,順路經過永利賭場,睇吓人工堆砌嘅奢華,返到酒店用埋啲餐飲券,飲番杯又傾吓講吓,咁又開心過一日嘞。




Saturday, October 4, 2014

澳門三

套票包括兩日早或午自助餐,呢朝食自助早餐,雖然麵包睇落唔錯,但我都係鐘情粉麵,唔敢食太多,因為澳門有好多其他美食等住我哋。


本來行程有龍環葡韻花卉展,但去到都唔見有乜嘢花,就逛逛附近寧靜嘅舊建築物。


呢日嘅午餐要分三次食,先到福隆新街食翅,見呢間排哂隊,我哋又要排,九十蚊一碗翅唔會要求太多喇,跟住食燉蛋,再去黄枝記食蝦子撈麵同埋雲吞麵,咁嘅午餐日日食都唔錯喎。


經過議事亭,好似唔見咗個噴水池咁,有舊異物喺中間,唔知係咪咁樣叫做張燈結采呢?

Friday, October 3, 2014

澳門二

我哋嘅套票包括有每二人四百蚊餐飲券,又有變形金剛展覽入場券。到咗酒店,為咗要用啲餐飲券,就嚟呢度high tea,件藍莓蛋糕好靚,味道唔錯,不過呢餐用唔哂千二蚊噃。

又為咗要用啲變形金剛入場券,幾個女人就去咗睇細路仔嘅展覽。喜來登酒店好大,就行嚟行去参觀埋酒店添。

到咗晚飯時間,導遊老友揀咗六棉酒家,我一早聽聞有杏汁豬肺湯就萬分期待,唸起細路仔時最鍾意睇阿媽洗豬肺,睇住個豬肺吹水脹起,放水縮番細,來來回回,情景喺個小腦袋停留到而家。

飯後番酒店經過賭場,同以前舊葡京年代好唔同。姊妹們派我做代表同何生玩番兩舖,我亦不負眾望為大家贏到啲杏仁餅手信番嚟,皆大歡喜。