蔘雞湯

呢排訪客多，出街食咗好多餐，我有好幾餐都同佢哋去食韓餐，一來我自己鍾意食，二來大蘋果嘅韓餐變化多，又正宗，成日食都唔厭。

呢日下晝食蔘雞湯，海鮮豆腐煲，牛仔骨，午餐份量細細份，我哋仲叫咗個綠豆葱餅。呢間餐廳冇一枱前菜供應，只有一壺好好味嘅泡菜，一碟青菜沙律，一碟生紅蘿白，長青椒同埋紹菜。長青椒就咁點辣醬食，脆卜卜，好新鮮，一啲都唔辣架。

TGIF

呢間餐廳喺美國好多地方都有，賣嘅係美式食物，大大件，最怕你唔肥。

呢日同細妹一家轉機時喺機場食嘅一餐，排骨好淋, 拼盆有pot stickers, mozzarella sticks and boneless Buffalo wings, 再加一碟potato skins，碟碟都咁大碟，我哋四個人都食唔晒呀。

一鹹一甜

老友一家由温哥華飛過嚟大蘋果，再租車去美加幾個城市參觀大學，老友大仔出年要入大學，趁放暑假就嚟東岸呢邊，又玩吓，又睇吓學校。

經過三個星期舟車勞頓，老友返番嚟大蘋果，我除咗同佢哋出去食，出去玩，呢日就叫佢哋嚟屋企食住家飯，三個禮拜都喺外面食，一定好掛住啲湯水嘞。

老友細仔得幾歲大，等我整個爛玻璃啫喱俾佢至得。我又整咗個三色蛋做冷盤，俾老友送酒。咦，乜呢兩盤嘢咁似樣，都係一粒粒切成一塊塊，一鹹一甜，各適其適。

另一個冷盤係凉伴茄子，而另一個甜品就係綠茶紅豆糯米滋。

甚麽湯

通常喺暑假，都有好多朋友嚟大蘋果玩，今年亦唔例外。去咗香港幾日，同細妹一家一齊返嚟，之後日日出去玩，出去食。噚日佢哋走咗，我終於有時間抖一抖，去咗屋苑泳池享受吓呢個靚到暈嘅天氣，聽日有另一朋友到訪，又有得熱鬧。

日日出咗街，煮唔到飯，呢日去咗食中餐，除咗呢啲餸菜，仲有叫咗個粉葛蓮藕鲮魚湯，係一煲湯攞出嚟，飲完湯，我哋想食啲湯渣，攞湯渣出嚟之後一睇，咦，呢舊乜嘢嚟架？有人話係穿山甲，有人話係野豬，問吓伙記，佢只係話厨房乜嘢骨都擺落去。咁都得？

佳佳甜品

呢個暑假睇住自己發脹，唔緊要啦，過埋呢個禮拜，假期結束，再作打算。

平時上網睇埋blog友嘅食店介紹，唸住返香港時就去試吓，但胃只得一個，唔係間間都去到。有人話甜品有另一個胃嘅，呢晚就嚟咗佳佳，其實我三種糊都想食，但點食得咁多呢！

仍是食

屋企一家一共十幾廾人，隔個禮拜多數人都番屋企食飯，煮咁多人飯都幾大陣仗，有特别日子嘅時候就出街食，呢啲係我喺美國時常懷念嘅。

姨甥女將要出國讀書，呢晚我哋又有藉口食好啲嘞，主菜係青班兩食，條魚有成四斤重，淨食魚都飽哂。

食在香港

返嚟香港幾日，都係同屋企人一齊，姨甥孫有八個月大，勁好玩。

呢朝早我捨棄茶餐廳，去咗南記食早餐。想食南記好耐，但住嘅地方附近冇，一直無緣食得到。

下晝去咗太和食日本餐，如果要我二揀一，我會揀南記，捨太和，唔知係咪有由細食慣嘅情意結，香港嘅粉麵係我每次返香港必食之選。

夜晚喺屋企食飯，徇衆要求，我整咗芋圓，又過咗一個嘻嘻哈哈嘅晚上。