籃球夜

公司成日贊助好多籌款慈善活動，需要義工出席，呢日公司叫我唔駛返工，嚟呢個推廣乳房健康嘅女子籃球比賽活動。比賽喺曼克頓嘅Madison Square Garden，我又出城喇！

  

雖然女子籃球同男子籃球無得比較，但呢晚賽事都幾好睇，仲打到要加時。喺現場睇打波，好熱鬧，令人好投入架。一開場要唱國歌，呢晚唱國歌呢位係乳癌鬥士，掌聲如雷。

中場休息時，又係一輪表演，仲有送紀念品俾幾位乳癌鬥士，包括我呀！睇吓呢件有我個名嘅粉紅色球衣，好靚架，唔似有冇機會著呢？

消暑妙品

噚日放假搵嘢攪，整咗兩個甜品，企到腳都軟埋。

第一個係跟高Ling整嘅芋圓紅豆涼粉，要整三種芋圓，芋頭，番薯同埋紫番薯，三種材料水份唔同，搓起上嚟都唔係易，好在都整得到，仲好好食添。

第二個係跟毛豆整嘅西瓜凍，整咗出嚟切唔到，震顫顫咁，旁人又催住要食，唯有唔影相，俾個西瓜佢成個捧住食啦，大熱天時，呢個真係透心凉。

BBQ

公司攪BBQ，今日我要返工，如果去BBQ就唔駛返，如果唔去就要返工，咁仲駛揀咩，梗係去同佢哋顛吓啦。

呢度喺街飲酒係犯法架，佢哋將啲酒放入cooler, 飲時就倒入膠杯度飲，或者好似我咁，用紙袋笠樽。

呢啲BBQ, 不外乎係熱狗，漢堡，串燒，佢哋志在飲同跳舞，我食埋嘢都走喇，當返咗半日工，賺咗半日假。

雪糕

今年夏天好似未點熱過，呢度就算點熱，都唔會好以香港咁熱。唸起細個喺香港住頂樓，好似蒸籠咁，都係得把風扇吹吓咋。

又唸起以前做工嘅地方，有同事為咗冷氣嘅温度高低鬧哂交，一個話太凍，一個話仲好熱，各不相讓。

大熱天時，有乜嘢好得過食番杯雪糕呢？呢隻雪糕好多時有特價，十蚊四盒，恨得我喺香港嘅屋企人牙癢癢。今次我又試新口味，海鹽雪糕鹹鹹哋，幾特别，不過我都係覺得椰子菠蘿食極唔厭。

出城記

唔喺曼克頓返工，就唔會時時出城。呢日約咗好朋友去博物館，有興趣睇Dan Graham嘅作品，展品喺天台，出到去一睇，就係咁啦。兩邊各一排樹葉圍牆，中間一面弧形玻璃，我哋兩個影吓相，努力搵呢件展品嘅藝術意義，得出結論係透過玻璃窗見到自已鬼魅地出現在樹葉中，另一個結論就係我哋唔識藝術。

玩完文化，我哋去玩奢華，喺The Pierre酒店吃下午茶，唔好以為我哋每樣一人一件呀，因為我朋友食到大半就飽咗，我又唔想嘥，咁又食埋佢嗰份，肥咗唔知好唔好怪佢呢？

朋友兒子今年入大學，我哋笑說以後可以多啲過呢種悠閒日子喇！

士林夜市

屋企人坐下晝機返香港，我同寶貝仔住多一晚，第二朝至坐早機走。

寶貝仔睇咗一本書係個台灣竹昇仔寫嘅，介紹士林夜市，原來佢要搵大雕燒，兩仔乸食啲咁嘢，真有點尷尬。又食咗七里香，個名咁好聽，其實係雞屁股，又係個仔話要試。

呢次台灣旅程好滿意，以後返香港時可以停兩日再玩過食過。

阜杭豆漿

細妹一家約咗家在台北嘅朋友食早餐，朋友帶佢哋去阜杭豆漿，好出名架。佢哋約咗六點半等，去到條隊已經排到幾長喇，要咁早去排長龍食個早餐，幾好食都唔駛預我，不過細妹買咗好多外賣番嚟，我哋唔駛排隊都有得食。

熱豆漿睇起嚟好吸引，呢個無買番嚟，外賣只有凍豆漿，都唔錯。

Broken Glass Jello

前一排見 blog 友 Mrs. Wu 整咗靚靚啫喱，我又要跟住玩吓先，好易整，我用手機寫 blog, 唔知點樣連結，如有興趣，我係跟 Cantonese Recipe Videos 整嘅，幾好玩。