鼎泰豐

上次去台北，已經係十一年前嘅事，記得去過鼎泰豐食小籠包，當時佢已經係出咗名，但間舖都唔係好大間，今時今日，佢喺全世界好多地方都有分店，不過紐約仲未有。

呢晚係星期六，去到鼎泰豐話要一百分鐘至有位，梗係唔等啦，買咗幾盒外賣，企喺門口來個餐前小吃吧！

九份十份

我哋呢日包咗架旅遊車，自組旅行團。第一站去九份，風景好靚，成條山路都係食嘅舖頭，點忍得唔食呢？尤其啲粉圓，上山食一次，落山又食一次，食番夠本。有人食潤餅，我都食咗一啖呢！

我話未睇過那些年，屋企人都笑住話有冇攪錯？我淨係記得同我細妹睇搭錯車，兩個喊到收唔到聲。呢日喺度行，好有文藝片味道呢！

呢度啲餐廳全部都有無敵海景，其實我哋只係食碟頭飯，但有海風，又有靚景，呢個午餐都唔錯。

去完九份，我哋去咗十份，呢度有菁桐車站，又有放天燈，我哋柴娃娃玩得十分盡興，呢個一日遊亦圓滿結束。

饒河夜市

去咗台灣幾日，日日都有雨落，當地人話六月份係梅雨天，日日都會落雨。

呢日食完個超級份量嘅午餐，我哋就返酒店，執好行李，要坐車去台北啦。我哋住嘅酒店喺台北車站對面，樓下係地下街。

呢晚嘅晚餐喺地下街food court解决，其實都唔易選擇，因為樣樣都想試吓。食完飯，喺地下街行吓，幫助消化，因為跟住我哋要去饒河夜市，又再食過，食咗胡椒餅，牛肉粒，藥燉排骨，飲埋苦瓜汁，唔可以話係掃街，樣樣試少少咋。

碗公

今次旅行全部由姨甥女安排，我因為前一排較忙，連上網睇吓宜蘭係乜嘢地方都無時間，唸住多數係近郊地方。

我哋住和風温泉旅館，旅館對面就有稻田。中午去咗一間叫碗公嘅餐廳食飯，到咗餐廳，喺出面影吓相，旁邊有大池塘同埋鴨農場，心唸今餐梗係食農家菜嘞。

當佢哋推咗呢兩盆嘢出嚟時，個個都嘩嘩聲，食晏咋喎，無唸過食啲咁嘅嘢，之後就一浪接一浪，鮑魚湯好好味，個湯碗大到好似花盆咁，唔知係咪咁，所以店名叫碗公呢？條蒸魚係魚生架上面個半條魚嚟架，一半做咗魚生，食完魚生攞番嗰半條魚入去蒸。餐廳伙記話雞同埋魚都係佢哋自養架，好新鮮。

全間餐廳有八張大枱，每枱都有叫嗰盆大嘢。姨甥女話係佢台灣朋友介紹嘅，不過佢朋友都未食過架，因為訂位要兩三個月喎，我哋係閒日去，所以一個月前訂都訂到。