拉斯維加斯

我哋一家三口啱啱去咗Arizona 同埋 Utah 四個國家公園返嚟。幾個月前我哋商量今年渡假嘅地點，我唸應該趁我仲行得去吓啲國家公園，舊年我同啲朋友去首爾玩時，有兩個都唔行得，行幾個街口已經話腳痛，佢哋大我幾年咋。

終於揀咗一個四天四個國家公園嘅團，呢個團喺拉斯維加斯接我哋，咁我哋就早一日到咗呢個罪惡之城。其實我哋去過呢個地方都唔知幾多次，寶貝仔當時仲好細個，不過佢都記得嚟過，詳細情形就無謂提佢啦。

每年Memorial Day 長假期，都係NBA籃球進入決賽嘅時候，呢晚我家兩個籃球迷就寧願喺房食pizza飲啤酒睇波，都唔願出去。到我哋去完個團再返嚟住多一晚，至出去食番個自助餐。我揀咗Planet Hollywood, 個 prime rib 最正，其他就分區域，有亞洲，墨西哥，中東，意大利，當然少不了甜品。

賭城有一個buffet deal, US$49.99 可以在七間餐廳二十四小時內任食自助餐，寶貝仔話有興趣，叫我哋下次再嚟喎。仔，你有興趣啫，我無噃。

煮飯

寶貝仔學期结束返咗屋企，梗係要煮番啲中國嘢俾佢食，上次喺香港買咗粘米粉，就整蘿蔔糕喇，另外又整咗海南雞飯，都係用喺香港買嘅套裝，連薑蓉醬料都有齊，非常方便，仲有煲咗夏枯草添。

太耐無煮飯，整少少嘢都攪足一日，生疏哂。

出賣

上一篇提到嘅趣事係想講韓風好勁，連老人家都迷韓星，見到個後生仔都唸起韓星，點知大家將焦點轉咗去個A貨韓星嗰度，我唸我個仔唔會睇到我寫嘅嘢，就喺呢度出賣佢一次啦。

呢張相係三年前影嘅，朋友家姐就喺嗰陣時見到呢個A貨韓星，大家估唔估到邊個係A貨韓星呢？

今次出賣個仔，連啲朋友仔都出賣埋添，朋友仔中有一個係韓國人，都可以做A貨韓星架。

星星趣事

朋友喺母親節嗰日傳咗呢張相俾我，佢唔知我而家睇緊星星架，不過我一個韓星嘅名都唔識，冇得同佢搭咀。

我覺得喺星星裏面呢個靚仔比女主角後生好多，睇起嚟好似同我個仔差唔多大，由此令我唸番起兩三年前一件趣事。我呢度有個朋友，佢家姐同姐夫由新加坡嚟探佢，有一晚約埋一齊食飯，我同我個仔去，佢家姐見到我個仔不知幾開心，原來佢覺得我個仔似唔知邊個韓星，仲要同佢影相留念喎。朋友家姐已經退咗休架喇，你話幾可愛呢！

噚日又係食韓國快餐，下次要去搵間炸雞食吓至得。

一家一菜

又係我哋幾對夫婦嘅團契時間，為咗大家可以輕鬆啲，我哋每一家煮一個餸，還特登唔好問大家煮乜嘢，攪攪新意思，睇吓會唔會有全雞宴或者全甜品宴。

呢晚又幾夾喎，有蜆肉白汁意粉同埋海鮮紅汁意粉，磨菇沙律，有新加坡人整嘅椰汁飯，我仲未讀到個名，配我整嘅薯仔雞翼啱啱好，仲有甜品生果，冇影到相添。

睇星星

的起心肝睇韓劇，從未睇過，啱啱開始。好新奇喎，怪不知咁多人睇，同我哋嗰啲好唔一樣。

又食韓國餐，呢晚燒鴨肉，前菜擺滿枱，人嘅口味會變架，我以前好怕佢哋送嘅玉桂茶，而家又接受噃。

成間餐廳坐滿個樣好大男人嘅韓國佬，都無一個整過容嘅靚仔睇吓，唯有返屋企睇星星嗰啲喇。