星星熱

唔知點解我冇追劇集嘅習慣，記憶中以前睇過他來自江湖，亦睇過趙薇做小燕子嗰套，唔記得個名添，最近睇嘅都已經係幾年前嘅溏心風暴。二十年前仲有好多戲睇，差不多每晚放工都租隻鐳射碟返屋企睇戲，唔知香港而家仲有冇人拍戲嘅呢？

最近韓劇流行，乜都星星一番，攪到我心思思想睇添。

有朋友喺温哥華嚟玩，同佢去食飯，當然唔敢食中國餐，怕失禮嘛。揀咗去KTown 食韓國餐，我自已都好耐冇出城喇，好多餐廳都改哂，多咗好多韓式Cafe。

呢晚有燒烤拼盤，海鮮餅，人參雞湯，晚餐後去cafe飲番杯架啡，渡過一個星星晚上。

遲來的櫻花

上個月去温哥華見到週圍都係櫻花，唸起幾年前我都去過Brooklyn Botanical Garden,嗰度都好多櫻花，仲有鬱金香，心想今年要再去遊公園賞花。

噚日約咗好朋友準備一日遊，上公園網站睇吓櫻花陣勢先，原來櫻花得好少開咗咋，我哋決定唔去喇，唔想咁遠去到混吉。

一心唸住賞櫻花，我哋就近近地去咗Flushing一個公園，雖然唔係好多花，但都算還咗賞花呢個心願。今年天氣持續凍，就嚟五月喇，好多花仲未開呀。

紐西蘭青口

又係朋友聚餐時間，每家煮一樣餸，大家都輕鬆。呢晚我煮咗青口，喺超市有本地新鮮青口，仲好平添，但啲肉好細粒，我終於買咗紐西蘭急凍青口，鍾意佢大隻多肉，平時我用白酒煮，今次改用韓國米酒，加埋洋葱，蒜頭，蕃茄，翠玉瓜，芫茜，一樣好味，四磅都清哂。

朋友們整咗茄汁蝦西蘭花，baby back rib 同埋 lasagnas。呢度係咁喇，好多時又中又西就係一餐。

呢隻啤酒啲後生仔話好喎，我呢晚唔駛揸車，有得飲就得嘞。

宜家餐

上次去宜家，除咗買必食肉丸外，仲買咗三文魚，加埋樽美味醬汁，簡簡單單，好味架。

茶餐廳

呢類diner喺呢度有好多，我從來未試過喺度食晚餐，價錢又唔係平，做乜唔去間正式嘅餐廳食呢？

其實食個早餐都幾貴，又要俾税，又要俾貼士，呢啲食物自已整都得，不過有時約朋友食早餐，呢度坐得舒服啲嘅。

唉，呢度係冇港式茶餐廳架。