皇帝蟹

朋友話皇帝蟹季啱啱開始，我哋咁遠嚟到，一定要食喎。

呢隻蟹十磅重，一蟹三吃，淨係蟹腳都要分兩碟上，食完蟹腳佢哋仲攞番隻碟，用啲蟹汁煮麵。除咗蟹，仲有富貴雞，片皮鴨，甜品有蟹殼黄，高力豆沙，酒釀丸子。

樣樣咁好食，都話咗食在温哥華喇。

食在温哥華

老友從中國嚟温哥華探望兒子，叫我飛過嚟聚吓舊，幾十年朋友，當然奉陪。

一落飛機就去飲茶，我望吓啲價錢，一碟點心要五，六蚊，好貴呢！夜晚食日本餐，好正噃，象拔蚌刺身鮮味十足，牛肉刺身好掂，其他魚生件件肥美，同我喺大蘋果食嘅係兩回事。食完飯，我哋三人組去咗賭場，飲多兩杯，又重温過去廾幾年我哋喺各個賭場嘅戰績，年紀大咗，我發覺自已成日想當年，想唔認老都唔得。離開賭場，仲要去宵夜，真係玩到唔想瞓覺。

二十幾年前嘅一個三月天，我就係攞住兩隻喼，一個人移民到櫻花盛開嘅温哥華。

一人一爐

眨吓眼一個星期假期要結束嘞，寶貝仔今日就返番去學校。噚晚佢話想打邊爐，但我要返工，唔得閒買材料，咁不如出街食喇。不過呢度無乜火煱店，上網搵到呢間，就即管試吓。

呢間係台式涮涮鍋，同港式唔係好同，一坐低就每人一盒蔬菜粉絲丸丸放在面前，跟住就點肉類海鮮主菜，另外有好多單點材料，我哋仲食咗台式刨冰添。

呢間餐廳地方夠大，坐得舒服，不過我都係鍾意係屋企打邊爐多啲。

宜家

呢日又係閒日去行街，唔駛同人逼。宜家傢俬全世界都有，不過係呢度就行得好舒服，未去過香港嗰間，相信唔會好大間，上海呢，聽講有好多人喺店内瞓覺呢。

雖然明知宜家嘅傢俬質量一般，但每次睇見佢嘅設計都覺得好吸引，呢日我就買咗個鞋櫃同埋啲濕碎用品，另外買咗每次嚟必買嘅肉丸。

又喺度食埋個晏，有St Patrick's Day餐喎，不過我哋喺屋企食咗喇，我揀咗三文魚卷，寶貝仔就要肉丸，話好耐冇食過喎。

應節晚餐

聽日係St Patrick's Day, 今晚煮咗應節晚餐，龍蝦湯同牛肉都係前幾日喺Costco買，牛肉有埋香料，慢煮幾個鐘頭，最後半個鐘頭放埋椰菜紅蘿蔔就攪掂，無落薯仔喇，怕太多嘢食唔哂。而呢個 Irish soda bread 就自己整，上網揾食譜見幾易整，就試下玩，有人教用KA就唔駛自已搓，我梗跟喇，唔想搓到手軟嘛。

本來想整埋Irish cream cheesecake, 但我呢啲厨房低班馬，半日邊攪得咁多嘢，求其整個薑汁撞奶做甜品就算喇。

一年一度嘅應節晚餐，人人都滿意。

偷得浮生

呢日同朋友去Costco行吓街，週末嚟呢度係水泄不通，我哋閒日嚟就可以慢慢睇吓呢樣，睇吓嗰樣。Costco係大型貨倉，樣樣貨品都好大份，價錢相對便宜，不過呢度行會員制，每年要俾會費，我以前入過會，但我哋一家三口，點用得咁多嘢，後來都冇再入會，如果我想嚟，就約埋係會員嘅朋友嚟就得喇，我好多朋友都鐘意嚟呢度架。

呢度乜都有得賣，好多時仲有新貨介紹，係好吸引人，次次入到嚟，就算點忍手，點都會買到一二百蚊嘅嘢，如果唔忍手，都唔知點算，真係乜都有，睇吓萬萬聲嘅鑽石都係隨便放喺度咋。

下星期係 St Patrick's Day, 有好多應節食品，我就買咗 corned beef, 好易整架。

行完街，去咗食鐵板燒，佢哋鍾意玩吓火，或者用洋葱整火山，細路睇見就最開心。我同朋友就至在傾吓講吓，渡過愉快嘅一日。