呢日由灣仔行去銅鑼灣，慢慢行，尋找回憶。細個時住係九龍，以前啲人無事唔會過海嘅，到我去中環返工之後，就開始認識香港呢邊啲地方。
灣仔喺我同幾個同事雀局嘅地方，記得一間房就係一張麻雀檯咁大，我哋打到咁上下就出去廳食飯，食完飯又番入房打過，我當時得二十歲咋，又會過啲咁嘅生活嘅。
呢日經過波士頓餐廳，幾十年仲喺度喎，難得。和昌大押翻新得靚靚，樓下賣高級家居用品，樓上喺餐廳。經過鵝頸橋，有人打小人喎，我聽過未見過，影張相先。後來我屋企人話我影相唔怕俾人打咩，我見好多人影，無唸過添。
又行到去時代廣場，過年期間都唔算太多人噃，連碼無俾人撞到。但我心目中嘅銅鑼灣已經消失咗喇，太丸，松坂屋，三越都無晒。
行到下午茶時間，去咗北海道牛乳食番個三吋蛋治(唔知有冇記錯個名)，咁厚嘅蛋治幾得意，等我第日學吓先。
都市閒情半日遊，真寫意。
呢個冬天由一開始就凍個不停，街上嘅積雪層層叠叠仲未溶哂，馬路公路上嘅黑洞防不勝防，一個唔覺意揸車避唔到就會爆呔，所以日日揸車嘅壓力都好大。
咁凍嘅天氣最正就係打邊爐，雖然呢度啲材料冇香港咁多花款，但一班朋友圍埋烚吓烚吓都夠開心啦，朋友呢晚仲整咗紅豆年糕，啱啱焗起時外面脆卜卜，裏面煙煙韌，正啊！
見到有網友介紹蘭桂坊Lily & Bloom嘅午市自助餐，呢日約咗個後生女去試吓先。沿住條斜路行上去，後生女話俾我聽佢哋而家嘅蒲點，我亦話俾佢聽以前Disco Disco嘅風光，人生匆匆過，希望佢愛惜青春。
呢個係輕食自助餐，好味凍蝦三文魚沙律我食咗兩碟，所以主菜嘅燒豬腩肉同埋炸雞只食咗些少，仲有即整嘅芝士通心粉，飲埋架啡，呢餐都係128蚊一位，質素唔錯，環境又好，我仲叫後生女第日帶媽咪嚟試吓。
返咗嚟，見網友又去嗰度食晏，話價錢已加到148蚊一位。一加就20蚊咁加，我都發覺呢幾年返香港去親美心或者翠華，啲價錢次次都唔一樣，真難爲各位香港人。
難得今次返香港有十日咁多，揾啲嘢玩吓至得。網上見到有一個整蛋糕班團購，喺我未走前有一堂美其名情人節黑朱古力蛋糕，姨甥女又肯陪我去，就報咗名。從未去過乜嘢學整嘢食嘅班，成日都係喺網上跟人整，有時成功，也有失敗，所以今次都滿心期待學吓嘢。
老遠跑到去觀塘，課室喺工廠大厦，我又嚟一番懷緬嘞，細個住喺呢區，暑假工就係喺呢啲工廠大厦番工，物換星移，估唔呢啲工廠大厦仲存在。
入到去，課室坐滿人，睇見檯上嘅工具已覺唔多妥，海綿蛋糕已經整好，放喺心型模裏面，我哋全晚只負責把糖同埋忌廉打發好，跟住加入佢哋煲熔咗嘅朱古力，倒入個模就完成，跟住佢話蛋糕要放入雪柜四十五分鐘雪硬，全部人可以自由活動。我同姨甥女去咗APM行吓街食吓嘢，返到課室蛋糕仲未得，佢哋話今晚蛋糕太多，所以要耐啲喎。
等到夜晚成十點幾，終於等到個蛋糕，我哋求求其其灑上朱古力粉，放三塊朱古力喺面就完成，趕住走喇，浪費一晚時間，真混吉。
呢晚有另一班朋友約食飯，選點在沙田帝都酒店帝玉庭，我喺沙田火車站落車，上到去新城市廣場，人頭湧湧，指示又差，搵嚟揾去又要問人，真係唔認美燦都唔得。
朋友好似同餐廳個個都好熟絡，連大厨都行埋嚟傾吓計，又送咗好多甜品生果，蛋白杏仁茶食到個個讃不停口，水晶飽有奶黄同埋紅豆兩款口味，食到尾聲，無影相添。
前菜係好似木耳百合啩，有青芥辣味，非常開胃。朋友話呢度嘅义燒好出名，一食入口，即刻溶化，名不虚傳，攪到我唸起自已整嘅义燒，以爲都幾好味，而家覺得似柴皮。另一個朋友話要預訂嘅莱係黑豚豬金菇卷，味道亦唔錯。羊腩煲同埋勝瓜番茄魚腐煲全部都好食，滷水拼盤更加唔駛講，鵝片鬆化，大腸墨魚片都係我餓咗好耐嘅至愛。
多謝朋友安排，又食得满意，又有得聚舊吹水，如果唔係過年返香港，都未必有咁多飯局呢。
呢日朋友們約咗嚟呢間名貴大酒店嘅一百零幾樓飲下午茶，佢哋有所不知，我喺呢邊住咗咁耐，唔係好慣去啲咁名貴嘅地方架。雖然係唔多慣，但都好享受朋友們嘅熱情，坐得舒舒服服，睇住香港景色，傾番夠本。
連啲下午茶點都名貴過人，有燕窩架。不過可能係我唔識欣賞，覺得味道無乜特别。
一把年紀，識得耐嘅朋友都有唔同際遇，難得坐埋一齊，講吓過去，講吓未來，咁就過咗幾十年喇。
屋企人每個星期日都喺呢度飲茶，有位泊車，老父輪椅出入方便，點心亦唔錯，我呢次喺香港都去咗呢度三次飲茶嘞。
我每次喺香港飲茶，都叫啲我呢道無嘅點心，呢個豬潤腸粉，我三次都有叫，仲有呢個鮑絲撈麵勁好味，呢啲食物，我唸我日日食都唔會厭，不過耐唔耐可以食到，我都好滿足。
呢間酒樓喺荃灣如心廣場，我每次嚟到都會唸起呢個女主人，佢嘅人生真係寫劇本嘅都寫唔出嚟，唔知佢會唔會寧願要一個平淡嘅一生呢？
