年三十晚

年三十，天氣好好，上晝跟家姐去街市去買餸，人頭湧湧，感受到久違了嘅過年氣氛，買完餸，飲完茶，去咗花市買花同埋桔，好多年無喺香港過年，好開心啊！

見到新鮮出爐蛋撻，脹卜卜，點可以抗拒呢？除咗盆菜，我哋仲整咗龍躉，睇吓幾新鮮，魚檔正在生劏一條呢。

兩圍檯兩個盆菜，我都有份砌架，喺屋企食飯，寧啥熱鬧。食過團年飯，我哋又計劃初二嘅開年飯，初三嘅團拜，好忙碌啊！

祝大家馬年身體健康，平安喜樂！

大魚小魚

細路仔時最鍾意過年，仲記得有一隻蝴蝶夾，好似海綿質地嘅，鍾意到不得了，亞媽買咗一隻俾我，開心嘅程度肯定遠遠超過我長大後收到嘅鑽石首飾。

仲有幾日就過年，雖然呢度無過年嘅氣氛，但我呢幾年都有整啲蘿白糕，年糕送俾朋友，多謝好多網友無私分享食譜，等我都整得出幾似樣嘅各種糕點，加埋喺香港帶返嚟包裝，送出去時都好得體架。

今年唔整咁多喇，過兩日返香港，再買啲新模具返嚟再玩過。

又有新玩具

前一排喺面書見到人介紹呢個蒸焗爐，又可蒸餸，又係細焗爐，好似幾得意。上個月搬新屋，好朋友就送咗呢個蒸焗爐比我。

試新嘢，整咗椰汁年糕。原來呢個蒸爐有得較温度，今次較到最高温度，攪到個邊有少少焗嘅一樣，個面又唔平滑，要慢慢研究吓先。

越南手信

寶貝仔噚日返到屋企，猛話好肚餓，但咁樣肚痛肚屙幾日，都唔好咁快食咁多嘢。休息咗一晚，今日又坐飛機返去開學，唸起都好笑，我呢幾日同佢嘅對話總離不開：仲有冇屙？水定軟定硬？又諗起佢細個時，成日都要留意住便便嘅情况。

睇吓買咗乜嘢手信俾我哋先，貓屎架啡？梗係唔係真嘅，真嘅我都唔想飲，咁核突。佢即刻似模似樣冲番兩杯越南架啡俾我哋飲。仲有一本越南食譜，佢知道我係綠茶味嘅嘢都鍾意，買咗支綠茶味牙膏俾我添。

佢話肯定喺越南食錯嘢，以後都唔會再去喎。

牽腸掛肚

寶貝仔放寒假一個月，同朋友去咗越南三個星期背包遊，又坐長途巴士，又坐火車同埋内陸機。我自已後生嗰陣未去過背包遊，但都好鼓勵後生仔出去見識吓。我雖然唔係直升機父母，但始終會擔心，好彩而家科技進步，佢一路都有同我聯絡，又俾啲相我睇，我不知幾羡慕。

星期二佢玩完背包遊返咗香港，唸住第二朝就坐飛機返嚟，陪吓我哋兩老幾日，下星期就返去開學。

臨去機場前，佢又發燒又屙又肚痛，梗係上唔到飛機喇！都唔知食錯乜嘢，又唔知係咪凍親，去咗睇醫生，話係腸胃炎，俾咗藥食。休息咗兩三日，無發燒又無屙，唸住今朝返嚟。點知半夜起身又再勁肚痛，我喺咁遠，除咗牽腸掛肚，乜都做唔到，養兒一百歲，長憂九十九呀！

半夜我家姐同佢去咗急症室，打咗針食咗藥，而家好好多，睇吓聽朝又走唔走得先。凡事都可以由好嗰邊唸，感恩佢喺香港至病，如果佢喺越南病，我都唔敢去唸咯。

織冷衫

第一份工喺中環返工，有幾個女同事鍾意織冷衫，我又跟住玩。依稀記得間毛冷公司叫做美通，織一件衫都好貴，又要買冷，又要買針同埋紙樣，不過織咗出嚟係好開心嘅。離開咗間公司之後就無再玩織冷衫，直到個仔出世，就織咗一件咁大把。我哋屋企無舊物，不過呢件衫仔就有留低。

早排搬屋揾到啲織針，心郁郁想織番一件添。

凍到飛起

零下十二度，凍唔在講，最怕就係水喉凍到結冰而爆裂，又怕架車凍得滯撻唔著，心理壓力好大。

阿Q精神：呢度都唔係最凍，水牛城有三尺積雪仲凍喇。而家至一月頭，幾時而捱過呢個寒冬呀？噚日見香港網友話小寒整糯米飯，見到唔駛生炒，我即刻照跟。凍冰冰，食番碗糯米飯暖吓先。

牛油曲奇

上個星期睇到簡易食譜有牛油曲奇，見材料好簡單，屋企亦有齊，就開工整嘞。放入焗爐一陣間，就聞到牛油香味，成個厨房香噴噴，焗好後試一塊，好好食啊，亦唸起細個過年最鍾意收到嘅藍罐牛油曲奇，同佢味道一樣。

食過翻尋味，今日又睇簡易食譜，揀咗整蛋撻。喺厨房玩真係唔可以分心，啱啱放啲蛋撻入焗爐，電話就響，遠方好朋友來電，講咗幾句，就聞到燒焦味喇，快啲扭番細火先。本來想聽日送啲俾朋友，而家咁嘅樣，唯有自已食喇。

新的開始

噚日番工有個同事問：你聽日想唔想放假呀？我幫你番工吖。咁大隻甲乸飛埋嚟，梗係好喇，希望新嘅一年，大家事事都係咁如意。

臨時臨急叫咗啲朋友嚟食晚飯慶祝新年，平時我多數煮中餐，今晚攪攪震，改玩西餐。全部都係上網睇人點煮整出嚟，都有少少驚攪唔掂，好在有驚無險。

好朋友喺曼克頓開deli, 佢哋嘅lobster salad好出名，我食咗咁多年都仲喺咁鍾意食。今晚佢哋帶咗個拼盤過嚟，有齊lobster salad, crab salad 同埋white fish salad，真係好多謝佢哋，我又有口福嘞。