星加坡叻沙

年頭睇網友梁生梁太介紹喺星加坡買嘅呢隻叻沙有幾好食。雖然呢度馬拉餐都過得去，但就唔覺有食過叻沙。睇過介紹，心郁郁好想食，暑假時有朋友去星加坡，搭佢買咗兩包返嚟，心唸等我買埋配料就可一嘗好耐無食過嘅叻沙嘞。

某日放工返屋企，老公問：你買咗啲乜嘢麵咁好食嘅，再買多啲喇。佢食哂我好期待嘅叻沙呀！

後來喺網上知道香港都有得賣，所以上兩個月喺香港時即刻入貨，都揾咗三間超市，至係惠康揾到有貨。

噚日買餸，俾我喺呢度見到有得賣，仲有同牌子嘅架喱麵，好開心呀，老公以後唔駛係屋企煮個麵食都驚俾人鬧嘞。

海鮮鍋

前一排講過細妹同妹夫最鍾意去Century21買嘢，用我張會員卡有分儲，上次就收到60蚊現金券，趁未到期時快啲去用咗佢先，俾我加多20蚊，就捧咗呢個我人生第一個LC番屋企嘞。

其實我幾怕呢啲煲咁重，但成日喺網上見啲高手話得佢幾好，又鎖水云云，咁趁有現金券，就即管買個嚟玩吓。試新煲整咗韓式海鮮鍋，喺超市見到有韓式辣醬豆腐，再加啲海鮮，就成爲我啲嘅晚餐嘞。呢個好簡單，遲啲我就會跟啲高手學吓甚麽無水蒸雞，好好利用吓呢個煲至得。

聖誕大餐

以前做細路仔時過聖誕好熱鬧，忙住交換聖誕卡，屋企雖然細到不得了，但就會將縐紙掛到一屋都係，又將聖誕卡串起嚟。印象中無聖誕禮物收，但攪啲佈置都夠哂興奮啦。

聖誕大餐係睇報紙見到，從來未食過。再大個啲就整香腸菠蘿，已經係我啲嘅西餐喇！

住係呢度都唔見有聖誕大餐，多數人都喺屋企煮。噚晚平安夜，我哋去完燭光崇拜就一齊去同樂軒食晚飯，黑班兩食，個湯好甜，糯米飯大蟹都唔錯。西式嘅聖誕大餐，都係要自已喺屋企煮嘞。

普天同慶

呢棵樹係舊年影嘅，今次搬屋時將佢送咗俾教會一個朋友。樹上嘅掛飾我只留低少少做紀念，呢啲掛飾係我住喺墨西哥時，當地朋友教我整，唔單止靚，仲充滿住回憶。

喺呢個普天同慶嘅日子，希望大家心中充滿平安和喜樂。

自助餐

而家係旅遊旺季，工作忙到不得了，日日放工返到屋企都散咁滯，今日做冬就唔煮飯喇，好耐無去食自助餐，今次試新嘢，去咗法拉盛嘅NoriNori。其實我哋呢度都唔覺有人做冬嘅，好彩我屋企人whatsapp俾我睇佢哋做節，好熱鬧架。

呢間自助餐都唔係好多嘢食，不過再多都唔食得咁多。有人喺度即場開生蠔同蜆，夠哂新鮮。今晚我食咗生蠔，蜆同蟹腳，加上甜品，都好滿足嘞。熱菜有好多種魚，其中銀雪魚最好味。

雖然呢餐無食過肉，不過都好飽喎。

新玩具

呢部玩具幾好玩喎，噚日放假喺屋企攪咗幾個鐘頭，做咗個聖誕木頭蛋糕。係咪睇起上嚟都唔錯呢？其實做得唔係咁好，不過第一次做，又無人一齊研究，剩係睇YouTube學，整得出嚟唔好浪費咗啲材料，我已經好開心喇！

唸緊下次用佢整乜嘢好呢？

韓燒

妹夫每年都有兩次嚟大蘋果出差，指定動作係要去Century 21濕平。點知佢話喺曼克頓嗰間立立亂，買唔到嘢。我噚晚同佢食晚飯，食飯前俾佢喺Queens嗰間行一個鐘，收獲都唔錯。呢間百貨公司有會員制，購物有分數，滿一定分數就送現金券。多得我妹夫次次都用我張咭，耐不耐我就有現金券收架。

佢每次亦要指定去Cheesecake Factory食飯，但今次時間比較趕，去唔去添。另一間佢常去就係呢間，金剛山韓國餐廳，門口好有聖誕氣氛喎。我都有一排無嚟過，而家有燒烤併盤，可以有幾款肉，多啲選擇，少不了嘅係海鮮葱餅。睇見一檯都係前菜就開心嘞，仲有我最鍾意嘅生蟹，食哂唔夠喉仲叫佢再攞多碟，甜品唔再係玉桂茶，而係乳酪，好飽啊！

團購

前一排買過團購票去試啲未去過嘅餐廳，唔係咁吸引，所以無再買。有一日團購寄嚟電郵，鼓勵客户用手機幫襯，凡第一次用手機幫襯，送十蚊。我就買咗呢間101台菜嘅團購票，三十蚊可以買六十蚊價值嘅餐券，加上有十蚊送，我只係俾二十蚊咋。

我都無計住叫嘅菜幾多錢，點知張單嚟到啱啱六十蚊，咁就剩係放低貼士可以走喇。

好耐無食臭豆腐，都唔錯。仲叫咗紅燒元蹄，咁大隻食唔哂，仲要打包，呢餐真係抵過自已煮呢！

健身室

終於搬咗屋喇！面對四十多個紙皮箱，只可以慢慢嚟。大屋搬细屋，唔見一籮穀，我同我老公都唔係鍾意儲物嘅人，由其係我老公，成日掉嘢，所以我啲朋友成日話我屋企乾淨企理，硬係企理喇，佢一日都鍾意掉嘢，乜都俾佢掉哂喇！

其實我哋真係好少嘢。最近我有個朋友搬屋，佢單身一個人有八十幾箱嘢，佢有啲衫廾幾年仲留係度。我亦去過一個朋友屋企，張飯檯係放滿雜物，無一吋空間，唔知佢一家六口喺邊度食飯嘅呢？

新屋呢度有會所，全新嘅健身室無人用，我唸我無藉口唔做運動嘞，等我執好間屋，過埋聖誕，新嘅一年，就開始好好利用呢個健身室。