黑色星期五

我從未去過感恩節後嘅 Black Friday Shopping, 有朋友去過，揾車位都揾成個鐘，而且我好多時星期五都要返工，所以無乜興趣星期四半夜三更去趁熱鬧。

琴晚响面書有人寫呢個 stand mixer 有幾平，咁我一直都想買呢部嘢，就跟著佢講，上網買咗喇！連埋税同郵費300蚊，不過 Kohl's 有75蚊代用券俾番我，另外 KitchenAid 有50蚊回贈，應該好抵喇！希望以後用得著，唔好放喺厨房做装飾品。

火雞節

入鄉隨俗，住喺美國梗要慶祝感恩節喇，年年都整番隻火雞過節。美國人喺呢日係一家團聚，圍埋食一餐，好似我哋團年咁。我屋企人唔喺呢度，所以唔駛煮好多，唯一係隻火雞要焗幾個鐘頭，唔急得。

雖然唔係好多人一齊過節，但一家人坐埋食飯，閒話家常，好開心呢！

感恩節

聽日感恩節，公司會提供火雞餐，所以今日有啲同事就攪咗個聚餐，都係有啲人煮，有啲人就比錢。當然有食火雞喇，應吓節嘛。

好多人都有煮嘢嚟，都係一般老外嘅 macaroni and cheese, mashed potatoes, corn bread, rice and beans, salad ，我最期待嘅係一個巴裔同事個老婆整嘅 sweet rice, 以前食過，覺得好好食，顔色又靚，出面又無見過，唯有等公司有人攪聚餐嘅時候，睇吓見唔見到呢個色彩繽紛嘅飯至有得再食。

好嘢，今日有 sweet rice, 能夠過得温飽，仲有得選擇，真係好感恩啊！

抹茶百力滋

仲有幾日就要搬喇，今日又嚟食韓式快餐，我的魚生撈飯，老公的豬肉豆腐湯，以後想食呢啲嘢都無咁方便嘞。

見到呢個粗版抹茶百力滋，肥肥短短好可愛，其實味道同高瘦版係一樣。又見到呢個紅豆啫喱，包裝好靚，即管試吓，唉，好睇唔好食，仲幻想抹茶同紅豆好匹配添，點知失敗咗。

越洋購物

相信有唔少人都鍾意濕平，呢個真係老幼咸宜，豐儉由人嘅玩意。以前香港係購物天堂，但呢幾年香港啲嘢貴咗好多，而美國呢十幾廾年又流行outlet, 如果唔係要追住流行款式，好多時都會搵到又平又靚嘅嘢。

我住喺呢度咁耐，去 outlet 濕平已經唔再係我杯茶，不過每年總有唔少親戚朋友嚟紐約玩或者出差，去濕平已經係指定節目，個個都買到興高采烈，滿載而歸。

妹夫喺暑假時候嚟過出差，路經麥迪遜大道，睇見 J Crew 有樣板展銷，佢從未去過，約我第二日去行吓。其實喺曼克頓，好多時都有樣板展銷，我上個星期至有朋友問我要唔要 Ralph Lauren 樣板展銷嘅入場券，唔去喇，一來要返工，二來要出城咁遠，三來人到中年，著乜都唔好睇，失去咗買衫嘅興趣好耐嘞。

講番 J Crew 樣板展銷先，去到嗰日原來係最後一日，全部再半價，不過好多人，要排隊，我同妹夫買杯嘢飲，傾吓偈，排咗半個鐘頭就入到去喇。揀咗啲裙同埋鞋俾我細妹，馬上 whatsapp 問佢啱唔啱，呢條藍色裙喺 J Crew 網站仲有得賣，對藍色有蝴蝶結嘅鞋喺正舗仲賣緊。因爲再有半價，每條裙同每對鞋都係三十蚊，我妹仲話：點解唔同我買多啲？

越洋購物都可以咁開心嘅？

番薯糖水

喺香港通街都係甜品店，仲要有啲排隊排到去隔離街，呢兩次返香港都無緣食到松記嘅甜品，無論係深水埗定係荃灣都排哂長龍，爲咗食一碗甜品要排隊，唔好預我。

我住呢道咁多食肄，但就唔見有甜品店，想食中式糖水嘅時候，就唯有自已煲喇，而家天氣開始凍，整番個番薯糖水加勁多薑，食完暖粒粒。

點解紫色番薯比金黄色番薯貴三倍嘅？香港係咪都係咁呢？

韓風

屋企附近最近開咗間韓國連鎖超市，生意非常好，週末更人頭湧湧。我覺得同一連鎖超市，呢間比其他店更好生意係因爲佢好多示範試食，連三文魚生都有試食，呢日我就見到個强國女，用支牙簽一件一件咁串起嚟食，食完一串再串過。連强國人都啥强國超市唔去而嚟呢度，所以咁好生意囉。

超市裏面仲有快餐部，又有 Paris Baguette 賣韓式超靚麵包糕點，我都嚟幫襯吓先，馬卡龍唔係太甜，綠茶味最正。

呢排多咗食韓國嘢，係因爲好快就要搬離皇后區，以後要食韓國餐，就要揸車返嚟，趁仲未搬之前，食多佢兩餐先。

千呼萬喚始出來

我升級做姨婆喇！我姨甥女生咗個仔，十二号入醫院，仲唸住BB會同佢媽咪同一日十三号生日添，等我日夜守住部電話，點知你急佢唔急，到十四号佢至出世！

我哋全家都好興奮，屋企好耐冇BB嘅聲音嘞。我好想抱抱BB，又想食薑醋，又想食雞酒。而家係咪唔興擺滿月酒，改擺百日宴？咁我咪要計劃一下三個月後去香港睇BB！

食不厭的韓國燒烤

上個月去咗首爾幾日，一日三餐都食韓國餐，以爲食到夠哂，有排都唔想食。一個月過咗去，呢日經過法拉盛嘅韓國街，又想食韓燒嘞。

呢度嘅韓國餐廳都好正宗，入到去就似身在韓國，好多時待應嘅英文都麻麻地，今次嚟呢間叫 Hahm Ji Bach, 有會講國語嘅亞珠媽，方便得多，今次我哋叫咗啲未試過嘅鴨肉同埋五花肉，亞珠媽仲教我哋點樣食。

五花肉燒到厚切煙肉咁，好香脆，用片好薄嘅酸蘿白包住嚟食，味道好夾喎。呢碟一片片圓形嘅係鴨肉，唔知點切可以切成咁？有少少肥，燒起上嚟梗係好食喇。天氣咁凍，食韓燒啱哂。

離巢燕

兒子喺暑假時留係大學返暑期班，同幾個同學合租一間屋，有時就煮吓飯，影咗啲相俾我睇，第一次自已煮飯食，算係唔錯嘞。

其實有好多人十九歲巳經做好多嘢，呢一代喺温室長大嘅細路，自已能夠煮食執屋，我哋已經話佢哋叻，係咪我哋要求低呢？

再見上海

點樣愉快嘅假期都會結束，呢日下晝要坐飛機走喇，朝早就叫朋友帶我舊地重遊。

我哋行咗兩個鐘頭，經過准海路，華亭路，一路行就一邊講我哋以前嘅傻事，終於行到嚟錦江飯店，不過就無可能上去揾番以前住嗰間房，錦江對面就係錦江俱樂部，我以前返工嘅地方，而家就係花園酒店嘅入口。

我要食生煎包同埋油豆腐粉絲湯，就走入去呢間國營食店，呢度同我呢幾日去嘅食肆有天淵之别，不過我要懷舊嘛！

約埋另外兩個朋友喺外灘三号食晏，上到去係一間西餐廳，我哋坐响出面，對住蒲東，碟碟菜攞出嚟都好似一幅圖畫，咁樣嘅上海，同我住過嘅上海，係兩個世界呢架。

繼續大閘蟹

之前一晚玩得太開心，呢日一早起身去飲茶，去咗間叫龍鳳嘅餐廳，我哋坐喺出面，秋風輕吹，環境一流，但點心味道仍未及得香港。

下畫我哋去咗世博，睇吓清明上河圖，又坐咗地鐵，去外灘Hotel Indigo 飲杯嘢，睇吓夜景。

夜晚我哋又食大閘蟹，今次飯局係喺新天地一間西餐廳嘅角落，爲我哋下厨嘅係餐廳老板嘅家厨，所以我哋點咗啲好家常嘅小菜，唔好睇嗰碟黑麻麻以爲係乜嘢，好好食嘅葱油雞呢架，啲洋葱香到不得了，隻雞又滑到不得了。

我哋每人都要一公一乸嘅大閘蟹，食完一隻再蒸一隻，一邊飲住紹興酒，一邊懷緬以前青春歲月，傾極都傾唔完。