人約中年後

今次去上海，約咗幾個以前喺上海工作認識嘅朋友聚舊，有人住上海，有人住北京，香港，所以呢個聚會喺好難得。

呢晚嘅飯局，仲見到有啲廾幾年無見面嘅朋友，我哋都唔知從何講起這些年嘅變化，大家都好興奮，仲約埋明年再攪大聚會。

上海的秋天，梗係食大閘蟹，掛住講，掛住又飲又食，只影咗幾張相，嗰個外婆紅燒肉好正架，又記得食咗只有喺上海至有嘅鲥魚。食完飯仲去唱K，估唔到我哋仲好似後生嗰陣咁癲。

上海鼎泰豐

去到上海，朋友問：你想食乜嘢？中餐定西餐？我話梗係食中餐喇。呢嗰下晝就嚟咗鼎泰豐。原來上海D餐廳好多人排隊，呢間亦不例外，不過朋友係熟客，所以都唔係等好耐。

我只係去過台北嘅鼎泰豐，連香港嗰間都未去過，睇睇餐牌上嘅介紹，全世界好多地方都有分店，包括西雅圖同埋洛杉機，點解紐約無嘅？

咁好食嘅嘢，睇番都好回味。除咗小籠包，最好食嘅係酒釀丸子，粒湯丸入面係芝麻。本來我唔多鍾意食白色皮嘅蒸包，不過呢個芝麻包又好好食。

食飽之後，就喺新天地附近行吓街，見到有人喺間餐廳門前擺佈景板，大家睇吓，呢嗰百日宴嘅主角叫做鑽石呀！唔通佢老豆賣鑽石，唸住揾嗰仔做生招牌？

一蘭拉麵

講到要排幾個鐘頭去食一碗拉麵，等我都試吓先。

這間拉麵二十四小時營業，我哋朝早十點去，唸住如果要排隊就去第二度食，不出所料，熱潮巳過，唔駛排隊。入到去裏面，係一人一格咁坐，待應喺你前面個小氣窗同你落單，大家見唔到大家，麵到咗，仲落埋塊簾，等你專心食。

我好鍾意食麵。這拉麵固然好食，但成90蚊碗麵，得兩片薄一薄嘅义燒，我覺得雲吞麵，牛腩麵都一樣咁好食，我唔會再嚟呢度喇！！

九龍城小曼谷

以前都去過九龍城街市食泰菜，今次跟咗網友Katie的介紹去路邊街美食，一入到去，令我呢個成日鍾意懷舊嘅人好興奮，有十年無去過曼谷喇，睇見D泰式美食，又想起以前嘞。

叫咗泰式奶茶，D泰式河粉好得意，一卷卷咁，唔係好大碗，正好，横掂我哋仲要去食豆腐花，不過就食唔落煎豆腐嘞。

一場嚟到，梗係週圍行吓，買咗好多泰式醬包，見到用膠袋装住D泰式鳳爪，又買番兩袋，仲買埋甜品，返屋企慢慢嘆。

老金煎餅

約咗朋友喺中環食晏，佢話要帶我食四川私房菜。這私房菜俾我感覺就好似一間開喺樓上嘅餐廳一樣，味道唔錯，但無乜特别。

食完飯週圍行，經過鏞記，又唸起往事，嘩，乜我有咁老喇咩？唔到你唔認，確是三十幾年前嘅事嚟架。那時喺中環返工，公司包伙食，每日都係鏞記飯盒，唔係义燒，就係燒鵝，嗰陣細個，都唔知鏞記係好嘢，不過日日食，幾好嘢都會厭，所以有時都會出去外面揾食，所以呢日行到士丹利街，就有D感觸嘞。

行吓行吓，差唔多到下午茶時間，見到呢間老金煎餅，唸起蔡瀾介紹過，亦係其他報刊見過，又見到有Nutella煎餅，一於試吓。一入門口就見到老闆，佢係美國人，喺北京讀書時食過煎餅，念念不忘。做工又成日幫人寫財務建議書，所以利用自已嘅知識，開咗呢間鋪頭仔，雖然佢嘅煎餅即點即做，好好食，但賣20蚊一份，又要交租，又有幾個伙記，我真替佢担心，唔知佢捱唔捱得住？

鷺梁津海鮮市場

呢一朝早，飲杯架啡，就坐地鐵嚟到呢個海鮮市場，從二樓望落去，真係令人興奮。我哋先去揾間餐廳，企企理理嘅，跟住就落去揀海鮮，呢度好多人識講國語，溝通無難度。反而我哋樣樣都想試，選擇就有困難。

終於揀咗隻近五公斤嘅皇帝蟹，韓國人唔會有椒鹽呀，油泡呀，不過咁新鮮就點都好食嘅。白灼蝦無辣椒油添，不過有wasabi，鮑魚是燒嘅，好正。見到街市張相有八爪魚嗎？嚟到我哋面前已經係切到細細舊喇，不過仲郁吓郁吓，有朋友唔敢食，唯有我哋D勇敢嘅去消滅佢。大大片嘅係不知名嘅蚌，呢個最唔得。又嚟飲米酒，良朋米酒，不亦樂乎。

人參鷄湯

今次去首爾，一行七人，浩浩蕩蕩，有人做好功課，除了吃喝購物，連汗蒸浴也去埋，行程比旅行團還要豐富。不過在首爾，言語不通好唔方便，我哋上咗的士，都俾司機叫番落車，又唔知乜嘢原因，試過三，四次都係咁，激死。

呢日中午去咗土俗村食人蔘鷄，好多人排隊，不過唔係等好耐。鷄裏面釀有糯米，湯裏面有人蔘，紅棗，味道不太濃烈。伴菜只有泡菜及蘿蔔，但這泡菜可是我食過咁多泡菜最好食嘅其中之一，加上一小杯人蔘酒，還有必點的海鮮葱餅，咁樣嘅午餐，真係要喺韓國至可以食到，我住呢度好多韓國餐廳，但就未曾食過呢餐嘅風味。

首爾行

去咗首爾四日，香港五日，上海四日，啱啱返到屋企，我睇我無肥十磅都有八磅。唸起聽日就要返工，心情難免有點失落，尤其在上海跟老朋友相聚，講起青春歲月的日子，又睇見上海這些年的變化，唉，歲月催人！

去到首爾已是傍晚，由機場去酒店都幾遠，放下行李，急急去吃韓燒，睇見街邊小食亦唔放過，樣樣都唔錯。

酒店就在首爾地鐵站，我哋要經過呢條隧道至到酒店出口，十分驚奇睇見咁多露宿者，都有好多人行過，所以唔係好驚，不過始終有股味道，點解咁大嘅城市咁大嘅地鐵站，有呢D情况出現?